Byrekë, pite dhe brumëra

Brumë për pica: receta italiane për furrën e shtëpisë

Brumë për pica si në Itali, për furrën e shtëpisë: miell, ujë, kripë dhe shumë pak maja, që rritet ngadalë. Del i lehtë, i fryrë në anë dhe krokant.

Përbërësit

Për brumin (4 pica rreth 26 cm ose 1 tavë 30 x 40 cm)

Për 4 pica margarita

Përgatitja hap pas hapi

  1. Në një tas të madh tretni majanë në ujë. Shtoni rreth një të tretën e miellit dhe përzieni me lugë, pastaj kripën dhe pjesën tjetër të miellit pak nga pak.
  2. Kalojeni brumin në tavolinë dhe punojeni me duar 10-15 minuta, derisa të bëhet i lëmuar dhe elastik. Shtoni vajin në minutat e fundit dhe vazhdoni ta punoni derisa ta thithë.
  3. Vendoseni brumin në një tas, mbulojeni dhe lëreni 2 orë në temperaturë dhome (20-24°C).
  4. Ndajeni në 4 topa rreth 210 g, ose lëreni të plotë për një tavë të madhe. Mbështillni çdo top duke e tërhequr brumin poshtë, që sipërfaqja të tendoset.
  5. Vendosini topat në një tavë të lyer pak me vaj, larg njëri-tjetrit, mbulojini dhe lërini 4-6 orë, derisa të dyfishohen.
  6. Ndizni furrën në temperaturën maksimale (250°C), me tavën e furrës ose gurin e picës në rafin më të ulët, dhe lëreni të nxehet të paktën 30 minuta.
  7. Hapeni çdo top me majat e gishtave, nga qendra drejt anëve, duke lënë një buzë 1-2 cm. Mos përdorni okllai dhe mos hidhni shumë miell: okllaji e shtyp ajrin nga brumi.
  8. Vendoseni brumin mbi letër furre, shtroni domatet dhe një fije vaj. Kalojeni shpejt mbi tavën ose gurin e nxehtë dhe piqeni 4-5 minuta.
  9. Shtoni mocarelën dhe piqeni edhe 3-5 minuta, derisa buza të fryhet e të marrë ngjyrë të artë dhe djathi të shkrihet. Për picën në tavë të madhe, mjaftojnë 15-20 minuta gjithsej. Hidhni borzilokun dhe shërbejeni menjëherë.

Historia dhe këshillat

Pica vjen nga Napoli. Më 2017 UNESCO e përfshiu “artin e pizzaiuolo-s napolitan” në listën e trashëgimisë kulturore jomateriale, ndërsa Bashkimi Evropian e mbron picën napolitane si specialitet tradicional që nga viti 2010. Pica e vërtetë napolitane piqet në furrë me dru, mbi 400°C, për rreth një minutë e gjysmë: në furrën e shtëpisë kjo nuk arrihet, prandaj ky brumë për pica është përshtatur për 250°C.

Gabimi më i shpeshtë: shumë maja dhe pak kohë. Brumi me shumë maja që rritet për një orë del i rëndë dhe vështirë për t’u tretur. Me pak maja dhe disa orë pushim, brumi zhvillon shije dhe del i lehtë. Gabimi i dytë është furra e pa nxehur sa duhet: tava ose guri duhet të jenë të nxehtë para se të futni picën, përndryshe fundi mbetet i bardhë e i butë.

Variante. Nëse doni ta përgatitni një ditë më parë, përdorni vetëm 1 g maja të freskët: pasi ta keni punuar, lëreni brumin 2 orë në dhomë, pastaj 24 orë në frigorifer, të mbuluar, dhe në fund 4-6 orë në dhomë para se ta hapni. Topat e brumit mund të futen edhe në ngrirje pas pushimit të parë, të mbështjellë në film ushqimor; shkrijini në frigorifer dhe lërini të rriten në dhomë para pjekjes.

Pica hahet sapo del nga furra. Për domaten, përdorni pelati të shtypura dhe jo salcë të gatuar: piqet në furrë bashkë me picën.