Tavën katrore me diametër 25 x 25 cm mbulojeni me letër pjekjeje, ndërsa furrën ngroheni në 180 gradë. Gjalpin dhe 270 gr çokollatë shkrijini me avull. Lëreni të pushojë për pesë minuta.

Gjatë kësaj kohe miksoni sheqerin e vezët derisa të fitoni një masë kremoze. Tek vezët shtoni masën e ftohur me çokollatë dhe përziejini mirë të gjitha me lugë druri.

Në fund shtoni miellin e kripën e situr. Përziejini mirë e shtoni edhe 30 gramët e mbetur të çokollatës, të grirë në copa.

Masën e fituar zbrazeni në tavën e përgatitur dhe piqeni në furrën e parangrohur për 35-40 minuta. Para prerjes, ëmbëlsira duhet ftohur mirë.